අඩ සියවසක නිම්වළල්ල

මෙරට පළමුවන සිංහල කතානාද චිත්‍රපටය වූ කඩවුණු පොරොන්දුව තිරගත වූයේ 1947දීය. එය පළමු සිංහල චිත්‍රපටය වූ සේම පාසල් සිසුන් පිරිසක් විසින් නිර්මාණය කරන ලද පළමු  හා එකම සිංහල චිත්‍රපටය ලෙස නිම්වළල්ල චිත්‍රපටය ඉතිහාස ගතය.  1970 දී නිම්වළල්ල නිර්මාණය කළේ රන්ජිත් ලාල් විසිනි. තරුණ අසහනය, සමාජ ස්ථරයන්හි නොගැලපීම හා යොවුන් ප්‍රේමය පදනම් කර ගනිමින් නිර්මාණය කෙරුණු එම චිත්‍රපටයට පසුගිය නොවැම්බරයට 50 වසරක් සපිරිනි.

ඡායාරූප හිමිකමඒ. ඩී. රන්ජිත් කුමාර මහතා සතුය.


50 වසරකට පෙර නිම්වළල්ල නිර්මාණයේ කළේ කොළඹ ආනන්ද විද්‍යාලයේ සිසුන් පිරිසකි. එහි අපූරැ කතාවක් තිබේ. රන්ජිත් ලාල්, ප්‍රේමකීර්ති ද අල්විස්, ආතර් නම්මුනි ද සොයිසා, චන්ද්‍ර ශ්‍රී මුදන්නායක, ආනන්ද නිලවීර හා ඒ. ඩී. රන්ජිත් කුමාර ආනන්දයේ එකට උගත් සිසුවෝය. පාසල් වියේදී කෙසේ හෝ කෙටි චිත්‍රපටයක් නිර්මාණය කිරීමේ උණක් ඔවුනට වැළදී තිබිණි.  එහි ප්‍රතිඵලය වූයේ ‘වෙර‘ නමින් කෙටි චිත්‍රපටයක් බිහිවීමය. එහි කතාව ප්‍රේමකීර්ති ද අල්විස්ගේ විය. එහි තේමා ගීතය ලිව්වේ ද ඔහුය. රන්ජිත් ලාල් අධ්‍යක්ෂණයෙන්, ගායනයෙන් හා සංගීත නිර්මාණයෙන් එයට දායක විය. එහි කලා අධ්‍යක්ෂවරයා වූයේ ඒ. ඩී. රන්ජිත් කුමාරය. ඩිල්මන් ජයරත්න කැමරාකරණයෙන් එක් විය. එම චිත්‍රපටයෙන් නිරූපනය වූයේ කම්කරුවන් හා පීඩිතයන් පිරිසකගේ ජීවන අරගලයයි.
වෙර අධ්‍යක්ෂණයෙන් පන්නරය ලද රන්ජිත් ලාල්ගේ ඊළග වෑයම වූයේ කෙසේ හෝ වෘත්තාන්ත චිත්‍රපටයක් අධ්‍යක්ෂණය කිරීමය. ඒ සදහා සුදුසු කතාවක් ලියන ලෙස ඔහු භාර දුන්නේ  ඒ වන විටත් ආනන්දයේ ඉගෙනුම බලමින් සිටි සුනිල් මාධව ප්‍රේමතිලකටය. ඔහු පාසල් අධ්‍යාපනය ලබන අවදියේම සිළුමිණ පුවත්පතේ ලේඛකයකු ලෙස කටයුතු කළේය. සුනිල් මාධව අපූරු කතාවක් ලීවේය. එහි තිරනාටකය ලීවේ ආනන්දයේම සිසුවකු වූ පසුව දක්ෂ මූර්ති ශිල්පියකු වූ අසෝක ඩයස් වීරසිංහය. ඒ.ඩී. රන්ජිත් කුමාර කලා අධ්‍යක්ෂවරයා විය.

චිත්‍රපට උණෙන් සිටි මේ කොලු රංචුවට වෙනත් පාසල් දෙකක  ශිෂ්‍යයන් දෙදෙනෙක් ද එක්ව සිටියහ.  ඉන් එක් අයෙක් කෑගලු මහා විද්‍යාලයේ අධ්‍යාපනය ලද ඩිල්මන් ජයරත්නය. අනෙක් සිසුවා නුගේගොඩ සාන්ත ජෝන් විදුහලේ අධ්‍යාපනය ලබමින් සිටි සුනිල් ආරියරත්නය. ඩිල්මන් කැමරා අධ්‍යක්ෂණයෙන්ද, සුනිල් ගීත රචනයෙන්ද නිම් වළල්ලට එකතු වූහ. එවක ප්‍රේමකීර්ති ද අල්විස් ආනන්දයෙන් සමුගෙන් ගුවන් විදුලියට එක්ව සිටි බැවින් ඔහුට එම චිත්‍රපටයට එක්විය නොහැකි විය. චිත්‍රපටයේ මුල් නම වූයේ ‘යළිත් වසන්තය‘ යන්නයි. පසුව එය‘ නිම්වළල්ල‘ ලෙසින් වෙනස් කෙරිණි.. සිරිසේන විමලවීරයන්ගේ නව ජීවන චිත්‍රාගාරයේ නිර්මාණය කෙරුණු අවසන් චිත්‍රපටය වූයේ නිම්වළල්ලය.

චිත්‍රපටයේ නිෂ්පාදන සැලසුම හා කළමනාකාරීත්වය බාර වූයේ ආතර් නම්මුනි ද සොයිසාටය. චන්ද්‍ර ශ්‍රී මුදන්නායක ඔහුගේ සහය කළමනාකරු විය. සහාය අධ්‍යක්ෂවරුන් වූයේ පසුකලෙක ලේක්හවුසියේ සභාපති වූ බන්දුල පද්මකුමාර සහ ආනන්ද නිලවීරය. සංස්කරණය එවක සාන්ත ජෝසප් විද්‍යාලයේ අධ්‍යාපනය ලැබූ ලාල් දිසානායකට පැවරිණි. සත් සමුදුර, වෙස්ගත්තෝ වැනි චිත්‍රපට නිෂ්පාදනය කළේ ලාල්ගේ පියා වූ දොස්තර ලීනස් දිසානායකය. එහෙයින් පාසල් අවදියේ සිටම ලාල්ටද සිනමාව පිළිබද මනා අවබෝධයක් තිබිණි. තවත් ආනන්ද සිසුන් දෙදෙනකු වූ මහින්ද අල්ගමට (චන්ද්‍ර මඬුලු යට සුරංගනාවෝ, රුක් අත්තන මල මුදුනේ වැනි ගීත ලියූ ප්‍රවීණ ගීත රචක) ගීත රචනයත් පසු කාලයේ දෙසතිය සඟරාවේ සංස්කාරකවරයා හා ප්‍රවීණ ගීත රචකයකු වූ ගාමිණී විජේතුංගට ප්‍රචාරක කටයුතුත් බාර විය. මහින්ද  ලියු  නිසයුරු  මුතුලැල්  ගීතය  එම චිත්රපටයේ රඟමින් ගැයුවේ   සී  ටී  ප්‍රනාන්දුය.

පාසල් සිසුන්ගේම තේමාවක් ඇසුරින් නිර්මාණය වූ නිම්වළල්ලේ ප්‍රධාන චරිත නිරූපනය කළේ ජානකී කුරුකුලසූරිය, ස්වර්ණා මල්ලවාරච්චි, රුක්මණී දේවි, සිරිල් වික්‍රමගේ, පියදාස ගුණසේකර, දේවිකා කරුණාරත්න, ජේ.බී.එල්. ගුණසේකරය ඔවුනට අමතරව, එවක ආනන්දයේ ශිෂ්‍යයන් වූ නිමල් හෙට්ටිආරච්චි, ( පසුව මහාචාර්ය) රත්නසිරි රාජපක්ෂ, (පසුව කොළඹ නගරාධිපති) නාලන්දයේ ශිෂ්‍යයකු වූ තිස්ස විජේසුරේන්ද්‍ර, මහනුවර ධර්මරාජ විද්‍යාලයේ ආදී  සිසු  අමරසිරි කලංසූරිය යන පිරිස එයට එක්වූහ.

 ප්‍රධාන චරිතය සදහා තෝරා ගැනුණේ කිසි දිනෙක වේදිකා නාට්‍යයක හෝ රඟ පා නොසිටි නිශ්ශංක අමරසිංහය. එම චිත්‍රපටය තුළින් මනා රංඟන හැකියාවක් ප්‍රකට කළ නිශ්ශංක ඉන්පසු කිසිදු චිත්‍රපටයක රගපෑවේ නැත. චිත්‍රපටයට දායක වූ බොහෝ දෙනෙක් එයට එක් වූයේ නොමිලයේය.

එවන අගමැතිනිය වූ සිරිමාවෝ බණ්ඩාරනායක මැතිනියගේ ප්‍රධානත්වයෙන් මංගල දර්ශනය පැවැත්විණි. එම චිත්‍රපටය සියලු දෙනා විසින්ම නැරඹිය යුතු චිත්‍රපටයක් ලෙස ඇයගෙන් සහතිකයක්ද රන්ජිත් ලාල්ට ලැබිණි.

චිත්‍රපටය ආදායම් අතින් ඉහළ මට්ටමක නොපැවතියද වියදම් පියවා ගැනීමට සමත් විය. චිත්‍රපටයේ නිෂ්පාදකයා වූයේද රන්ජිත් ලාල්ය. ඇත්තටම පාසල් සිසුවකු වූ ඔහුට මුදල් තිබුණේ නැත ඒ සදහා මුදල් දුන්නේ ඔහුගේ පියා වූ මිනුවන්ගොඩ පීල්ලවත්තේ ඩේවිඩ් සිල්වා මහතාය.

නිම්වළල්ල නිර්මාණය කිරීමෙන් පසු රන්ජිත් ලාල් යළි වෘත්තාන්ත චිත්‍රපට අධ්‍යක්ෂණය නොකළ ද පසුව රජයේ චිත්රපට අංශයේ සේවය කළ කාලයේ අගනා වාර්තා චිත්‍රපට කිහිපයක්ම නිර්මාණය කළේය. සිනමාව හා සංගීතය පිළිබඳ ඉතා පුළුල් අවබෝධයකින් යුතු ඔහු තම දැනුමෙන්  වැඩක් ගත්තේද යන්න සැක සහිතය.

50 වසරකට පෙර නිම්වළල්ලෙන් උපන් බොහෝ දෙනෙක් පසුකාලීන් විවිධ ක්ෂේත්‍රයන්හි ප්‍රවීණයන් හා නම රැන්දූ පුද්ගලයන් බවට පත් වූහ.  ඇතැමෙක් අද ජීවතුන් අතර නැත.

නිම්වළල්ල පිළිබද ව එවක දිනමිණ කතුවරයා ව සිටි එස් සුබසිංහ මහතාගේ සඳහනකින් මෙය අවසන් කළ යුතුයැයි සිතමි.

‘සුනිල් මාධව ප්‍රේමතිලක ලියා ඇති කතාව තිරය මත කියාපෑමට රන්ජිත් ලාල් සිනමා මාධ්‍ය නිසියාකාරව උපයෝගී කරගෙන ඇති අන්දම පිළිබඳව සලකා බලන විට නිම්වළල්ල සිංහල සිංහල චිත්‍රපටයකැයි හදුන්වනවාට වඩා එය සිනමාත්මක චිත්‍රපටයකැයි හැදින්වීම මැනවයි මට සිතේ. චිත්‍රපට කතාව විකාශය වීමට රන්ජිත් කුමාරගේ පසුබිම් නිර්මාණය මහත් රුකුලක් වී තිබේ. අධ්‍යක්ෂ රන්ජිත් ලාල්, කතා රචක සුනිල් මාධව ප්‍රේමතිලක කැමරාව මෙහෙය වූ ඩිල්මන් ජයරත්න යන අයගේ හැකියාව මතින් ප්‍රකට වන්නේ ඔවුන් ලාබාල තරුණයන් පිරිසක් ලෙස නොව ජීවිතය පිළිබද පුළුල් අත්දැකීම් සහිත විවේක බුද්ධිය හා අවබෝධ ඥානයෙන් යුතුව සමාජ ප්‍රශ්න දෙස සානුකම්පිතව බලන වයොවෘද්ධයන් කිහිප දෙනෙකු ලෙසිනි.“


ප්‍රියන්ජන් සුරේෂ් ද සිල්වා
ඡායාරූප හිමිකමඒ. ඩී. රන්ජිත් කුමාර මහතා සතුය.

 22 total views,  2 views today

Leave a Reply

Your email address will not be published. Required fields are marked *